Gjatë zgjedhjeve ose në kohë krize politike, publiku shpesh bombardohet me “ekskluzive” dhe “skandale” që duken tronditëse, por jo gjithmonë mbështeten me fakte. Në vend të provave, shpesh përdoren teknika që krijojnë dyshim dhe mosbesim ndaj kundërshtarëve politikë. Ja disa shenja që ju ndihmojnë të njihni përmbajtjen manipuluesе në media:
1. Pyetje në vend të fakteve
Kur një artikull gazetaresk bën një sërë pyetjesh (“A ka konflikt interesi?”) në vend që të japë përgjigje, kjo është shenjë se qëllimi është të mbillet dyshim e jo të informojë.
2. Fajësim përmes lidhjes
Nëse një person ose kandidat përmendet në kontekstin e një institucioni apo biznesi “të dyshimtë” pa prova konkrete, kjo është përpjekje për të krijuar “faj përmes lidhjes”, ku çdo lloj lidhjeje paraqitet si bazë për dyshim.
3. Thirrje tek autoriteti – pa prova
Kur përmendet një emër ose institucion i respektuar (“ekspert kundër korrupsionit”, “ish-zyrtar”), por pa deklaratë apo dokument konkret, kjo është teknikë manipulimi që synon të krijojë një ndjesi të rreme besueshmërie.
4. Koha e publikimit
Nëse artikulli shfaqet menjëherë para zgjedhjeve ose në kulmin e një krize politike, pyesni veten pse është publikuar pikërisht atëherë.
5. Mungesa e përgjigjes nga pala tjetër
Çdo artikull serioz kërkon mendimin e të gjitha palëve të përfshira. Nëse kandidati ose institucioni nuk janë pyetur ose cituar, kjo është një tjetër shenjë e qartë e njëanshmërisë dhe e një operacioni për diskreditim.
Mbani mend: Artikujt manipulues nuk përmbajnë gjithmonë gënjeshtra. Ndonjëherë mjafton të bëhen pyetje sugjestive, të përdoren fakte të zgjedhura ose të nënkuptohet faji për të ndikuar tek lexuesit.
Prandaj – lexoni me kujdes, verifikoni burimet dhe pyesni: Ku janë provat?
CIVIL – Qendra për Liri
Zëri juaj ka fuqi. Përdoreni!
Si të kontaktoni CIVIL?
📧 monitoring.civil@gmail.com
💬 Inbox: facebook.com/civil.mk
