Këshilltari në komunën e Gostivarit, Lekë Dalipi, në adresimin e tij në ngjarjen publike “Dialogje civile për marrëdhëniet ndërmjet komuniteteve: Sfidat dhe zgjidhjet”, thotë se temat si multikulturalizmi, barazia, respektimi i diversitetit nuk duhet të shihen si naive, sepse forcat e së keqes janë çdo herë më aktive.
“Takimet e këtij lloji janë të mira, kur flitet për temën e multikulturalizmit, për vlerat evropiane dhe për temat ndëretnike, të cilat ndonjëherë duken naive, por që nuk janë fare naive. Sepse pala tjetër, forcat e së keqes, janë shumë më aktive, sidomos nëse kemi parasysh se teknologjia ofron shumë mundësi për radikalizëm, si në baza etnike ashtu edhe fetare. Ata nuk flejnë, punojnë shumë. Ju duhej të vini nga Shkupi, këtu duhej të mblidhen “njëqind” veta, shikoni, janë rreth njëzet njerëz që janë këtu duke dëgjuar për tolerancën, dhe nga ana tjetër ka një audiencë të madhe. Pra, unë do t’ju këshilloja që të vazhdoni këtë luftë, megjithëse mendimi është se këto tema nuk janë më interesante në Maqedoni. E shihni, në Amerikë, një problem mund të lindë brenda një ore. Kjo luftë nuk duhet konsideruar kurrë si e përfunduar, duhet të ketë gjithmonë forca që luftojnë për një shoqëri të hapur”, porositi Dalipi.
D. Tahiri
Kamera: Dehran Muratov
Montazhi: Arian Mehmeti
Fotografia: Goran Naumovski
