Gjithsej 9.360 doza vaksina nga prodhuesi “Fajzer” dje kanë arritur në shtet. Prej tyre, 4.680 janë përmes marrëveshjes së drejtpërdrejtë që vendi e ka me këtë prodhues të vaksinave kundër Kovid-19.
Siç njoftoi Ministria e Shëndetësisë, sipas marrëveshjes, “Fajzer” çdo të hënë në Maqedoninë e Veriut dërgon nga 5.000 deri 7.000 doza vaksina, respektivisht 26.000 doza të parapara për tërë muajin.
Të tjerat, 4.680 doza të vaksinave “Fajzer” janë marrë përmes marrëveshjeve trilaterale në kuadër të programit “Tim Jurop” (Team Europe). Përmes këtij programi për përkrahje në furnizimin e vaksinave për Ballkanin Perëndimor, që e koordinon Austria, në vendin tonë në maj duhet të arrijnë gjithsej 19.890 doza vaksina.
Nga Ministria përkujtojnë se dërgesa e djeshme është e dyta, ndërsa ndihma për vendin, që e siguron BE-ja, është gjithsej 119.213 vaksina.
