Mamudie Ismaili nga fshati i rrethinës së Shkupit Llaskarcë, është një nga qytetare(ë)t e shumtë që nuk mundën të votojnë në rrethin e parë të zgjedhjeve lokale që u mbajtën më 15 tetor, sepse nuk u gjetën në Listën e Votuesve. Mamudia nuk mundi ta realizojë të drejtën për votim, edhe pse në zgjedhjet e kaluara ka qenë në Listë dhe ka votuar?! Ajo nuk deshi të flasë para kamerës së gazetarit qytetar Vullnet Mahmuti, por thotë se dëshiron të votojë në zgjedhjet, sepse kjo është e drejta e saj e garantuar.
Vëllai i saj Xhelal Ismaili ka votuar, sepse është në Listën e Votuesve.
“Problemi është se një anëtar i familjes time nuk gjendet në Listën e Votuesve, por jo vetëm ajo, çdo i dyti qytetar ankohet, ky problem duhet të zgjidhet – pse janë të shlyer qytetarët nga Lista e Votuesve”, theksoi Ismaili.
Ai shton se nga këshilli zgjedhor i kanë drejtuar në Komisionin Komunal Zgjedhor, ta paraqesin motrën e tij Mamudien, që ajo të mundet të votojë në zgjedhjet e ardhshme.
Më 29 tetor do të mbahet rrethi i dytë i votimit, në të cilin do të zgjidhet kryetari i Komunës Saraj.
CIVIL – Qendra për Liri apelon te Komisioni Shtetëror Zgjedhor të gjen mënyrë t’u mundësojë qytetareve dhe qytetarëve ta realizojnë të drejtën e tyre për votim.
Vullnet Mahmuti
