I është caktuar paraburgim prej 30 ditëve Aleksandar Janevskit – Toshta, i dyshuari i pestë për tentim vrasje të deputetit Ziadin Sela në ngjarjet e përgjakshme të 27 prillit në Kuvendin e Maqedonisë.
“Duke vendosur sipas propozimit të Prokurorit Publik kompetent, gjykata në procedurën paraprake ka përcaktuar masë për paraburgim në kohëzgjatje prej 30 ditëve për tre persona të dyshuar. Përveç kësaj, paraburgim prej 30 ditëve i është caktuar edhe personit të pestë, i cili më parë ishte privuar nga liria për ngjarjen e njëjtë, ku për të Vendimi Gjyqësor ishte anuluar, për shkaqe shëndetësore të të dyshuarit”, kumtojnë nga Prokuroria Publike.
Përveç Janevskit, në aksionin policor janë arrestuar edhe Andrej Micov, Nikolla Vojminovski, Kosta Dellov dhe Stojan Pavlevski – Kobra. Të parët që u arrestuan për sulmin ndaj Selës janë Kire Gjorgievski dhe babai i tij.
Me paraburgimin e fundit, gjithsej dhjetë janë të dyshuar për tentim për vrasje të deputetit Sela.
