Komisioni parlamentar për punë dhe politikë sociale, sot unanimisht e ka përkrahur propozim-ligjin për ndryshime në Ligjin për mbrojtjen sociale, në leximin e parë, i cili parasheh që shërbimi i asistencës personale të shfrytëzohet që nga mosha gjashtë vjeçare. Për ndryshimet do të mbahet edhe debat publik.
Duke shpjeguar ligjin, ministrja e Punës dhe Politikës Sociale Jagoda Shahpaska tha se ndryshimet i referohen shërbimit të asistencës personale, pra për të mundësuar që shërbimi i ndihmës personale të përdoret nga fëmijë gjashtë vjeç me aftësi të zvogëluar funksionale, në mënyrë që të sigurojë ndihmë dhe mbështetje individuale për fëmijët për të kryer aktivitete të përditshme për qasjen në institucionet arsimore, qendrat e rehabilitimit dhe përfshirjen e komunitetit, të cilat një fëmijë pa aftësi të kufizuara zakonisht i kryen pa mbështetje.
Me ndryshimet e propozuara, pritet që 200 fëmijë të marrin shërbim të asistencës personale prej 80 orë gjatë një muaji. Siç theksoi Shahpaska, mjetet për këtë ndihmë do të sigurohen nga Ministria e Punës dhe Politikës Sociale. Këta 200 asistentë janë planifikuar për gjashtë vitet e ardhshme, ndërsa 400 asistentë do të planifikohen për vitet e ardhshme.
Shahpaska theksoi se tani këto ndryshime me shërbimin e asistencës personale do të përfshijnë njerëzit e moshës nga gjashtë deri në 65 vjeç. Sipas saj, shërbimi për asistentë personal u përdor nga gjithsej 180 përdorues, ndërsa në të ardhmen personat që do të jenë ndihmës të personave me aftësi të kufizuara do të duhet të kalojnë disa trajnime.
Ministrja paralajmëroi se në periudhën e ardhshme një sërë ligjesh do të paraqiten në Kuvend, që do të thotë reformë në sektorin e mbrojtjes sociale.
Deputetët nga VMRO-DPMNE paralajmëruan mbështetje për ligjin, por konsiderojnë se të drejtat duhet të gëzojnë të gjithë personat me aftësi të kufizuara.
Anëtarët e Komisionit e mbështetën propozimin e Bllagica Llasovska nga VMRO-DPMNE për mbajtjen e debatit publik mbi këtë zgjidhje ligjore për të cilën përfaqësuesit e shoqatave të qytetarëve do të ftohen të shprehin nevojat e tyre. Ajo sugjeroi që mbase shteti duhet të punësojë asistentë personal dhe cilat do të ishin harmonizimet me asistentët e arsimit.
