Për shkak të rritjes së rrezikut nga përhapja e zjarreve, Ministria e Bujqësisë pas kërkesës së Ndërmarrjes Publike “Pyjet e Maqedonisë” ka vendosur ndalesë për lëvizje në pyje dhe tokë pyjore prej orës 06:00 deri në 20:00.
Ndalesa do të fillojë të zbatohet prej nesër (e premte) dhe do të vlejë deri në largimin e saj, përcjell Telegrafi Maqedoni.
“Kjo ndalesë nuk vlen për të punësuarit në NP Pyjet e Maqedonisë dhe për subjektet që kryejnë aktivitete pyjore në hapësirat që vepron NP Pyjet e Maqedonisë, si dhe për personat që kanë leje për lëvizje në pyje”.
“Për mosrespektimin e kësaj mase, personat fizik që kapen duke lëvizur në male dhe toka pyjore do të gjobiten prej 1500 deri 2000 euro, në kundërvlerë të denarit”, thuhet në njoftim.
Qeveria gjithashtu i kujton qytetarët se ndalohet djegia e barërave të këqija, si masë për të parandaluar përhapjen e zjarreve.
Ndalesën për lëvizje në pyje do ta zbatojnë të punësuarit në NP “Pyjet e Maqedonisë”, Ministria e Punëve të Brendshme dhe Policia Pyjore.
