Zgjedhjet përfunduan, por nuk përfundoi edhe dëshpërimi.
Zgjedhjet përfunduan, por nuk arriti jeta tek të gjithë qytetaret dhe qytetarët.
Zgjedhjet përfunduan, por persona të dyshuar fituan mbështetje institucionale.
Zgjedhjet përfunduan, por shqiptarët nuk u gëzuan.
Zgjedhjet përfunduan, por ….
Nuk mund të flasim për sot dhe nesër, duke krijuar atmosferë sikur asgjë nuk ka ndodhur gjatë qeverisjes 10 vjeçare të OBRM-PDUKM me BDI, ku të gjithë jemi dëshmitarë që gjatë kësaj qeverisjeje ishin prezentë – larja e parave, krimi i organizuar, krimi i jakave të bardha… Gjatë kësaj qeverisjeje për shkak të këtyre palëve të interesit, te qytetaret dhe qytetarët humbi besimi në institucionet shtetërore dhe u shtua frika për sigurinë e tyre. Pikërisht gjatë qeverisjes dhjetëvjeçare, “çuditërisht” ndodh që të kemi një varg rastesh me vetëvrasje, sulme terroriste, vrasje të porositura, incidente me karakter etnik… ASNJË PREJ RASTEVE NUK ËSHTË ZBARDHUR!
LSDM ishte subjekti politik që në zgjedhjet e parakohshme parlamentare premtoi zbardhje të rasteve, përgjegjësi për autorët e krimit, kthimin e parave te qytetarët, JETË PËR TË GJITHË!
Deri tani, jo që nuk u realizua asgjë nga ajo që ishte premtuar, përkundrazi, në zgjedhjet lokale LSDM bëri koalicion me BDI, shumë anëtarë dhe bartës të funksioneve nga ky subjekt politik janë të dyshuar për vepra të rënda kriminele. As mbështetja e pushtetit ekzekutiv për kandidatë të komunës të cilët janë të dyshuar në bazë të përgjimeve, nuk mungoi.
Vetëdija politike te trupi votues shqiptar fatmirësisht është në ngritje. Edhe pse politikanët e dyshuar nuk bartin përgjegjësi për veprat e tyre para institucioneve përkatëse, dënimin dhe përgjigjen e kishin të qartë nga populli. Pa mbështetjen e LSDM, BDI do të ishte partia humbëse e këtyre zgjedhjeve.
Thirrjet për bashkim dhe jetë të re të cilat në mënyrë deklarative i promovoi qeveria, nuk i zbatoi në vepër, por përkundrazi, e thelloi ndarjen mes qytetareve dhe qytetarëve.
